Rijn i Mississippi

Rijn i Mississippi
Loke e riu oropeo Rijn i esun merikano Mississippi tin komun ku otro ta ku nan tur dos ta pertenesé na e
riunan di mas largu di nan kontinente. Te einan e komparashon ta yega tambe, bon mirá. Meskos ta konta
tambe pa corporate governance na Oropa i Merka. Nan ta bisa ku na Oropa ta uza e 'Modelo di Rijnland' pa
supervishon den kompanianan. Na Merka generalmente nan konosé e modelo típikamente Anglosakson. Den
Karibe Hulandes i na Kòrsou tambe nos konosé e modelo di Rijnland. E diferensianan ta grandi.
Mayoria kompania na Oropa tin un asina-yamá struktura di dos nivel. Aki ta hasi un distinshon strikto entre
tareanan ehekutivo di direktiva i tareanan supervisorio. Un hunta independiente ta ehersé e tareanan
supervisorio: e hunta akí ta e hunta di komisario. Den fundashonnan (mas grandi) esaki ta e hunta di
supervishon. Den e modelo Anglosakson, mayoria biaha tin un asina-yamá struktura di un nivel. Akinan tin
solamente un hunta, e 'Board'. E Board konosé dos tipo di miembro: miembronan ku un tarea (spesialmente)
ehekutivo i miembronan ku un tarea (spesialmente) supervisorio. E Board kompletu ta adoptá resolushonnan.
Den esaki, kada miembro ta disidí for di su perspektiva spesífiko, spesialmente ehekutivo òf hustamente mas
supervisorio.
Ultimo añanan por ripará ku e distinshon ku inisialmente tabata basta severo ta birando lali lali tiki tiki, den e
sentido ku na Merka mas i mas kompania ta pasando pa e struktura di dos nivel di Rijnland, miéntras leinan
na Oropa (inkluso na Hulanda i na Kòrsou tambe) awendia ta pèrmití un struktura di un nivel tambe.
Sinembargo, e diferensianan entre e modelo di Rijnland i esun Anglosakson ta mas basá riba prinsipio. Den e
modelo di Rijnland, na hopi pais oropeo (i tambe den Karibe Hulandes) a fiha legalmente ku pa atministradói komisarionan den un empresa, kontinuidat di e empresa mester ta e direkshon di kòmpas di mas importante.
Bon mirá, tur resolushon mester ta someté na esaki. Ganashi riba término kòrtiku no ta realmente algu ku ta
balapena aspirá na dje. E prinsipio akí ta hopi ménos sentral pará den e modelo Anglosakson. Den e modelo
akí ta pega mas na balor di akshonista. No ta pòrnada ku hopi negoshi di famia ta gusta opta pa e modelo di
Rijnland, miéntras empresanan kotisá na bolsa, hopi biaha ta uza e modelo Anglosakson. E balornan den un
negoshi di famia di naturalesa ta dirigí riba kontinuidat (logro di bisatawela), mas ku riba ganashi riba término
kòrtiku ku por bai a kosto di kontinuidat.
Den fondo e diferensia akí tabata hunga un ròl den e nekrologianan den kaida di e kadena di empresa
hulandes Vroom en Dreesmann. Segun reportahenan, un di e kousanan di e baimentu bankrut (banda di un
operashon empresarial desesperadamente antikuá) tabata e likidashon rápido di bien inmovibel di V&D pa
generá sèn pa e akshonistanan (merikano). Den e modelo Anglosakson no ta nada straño pa chupa saka tur
kos for di un empresa komo akshonista i despues bent’é afó. Interes di akshonista i kreashon di balor ta pará
sentral. Den e modelo di Rijnland tòg ta mira esaki komo ménos nèchi i ménos sosial. Ta balorá kontinuidat
di operashon empresarial i empleo mas.
No nesesariamente un ta mihó ku e otro. Sí mi ta kere ku ta bon komo tòp di e empresa (akshonista, direktiva
i hunta di komisario) pa bo duna kuenta i rason regularmente di bo prioridat final: generá ganashi pa e
akshonistanan òf preferiblemente bo ke tin un funshon mas sosialmente ankrá. Meskos ta konta pa e
akshonista den Kòrsou su NVnan di gobièrnu: e gana di ke saka dividendo for di e NVnan akí talbes no ta
kuadra mes ku e funshon sosial i e responsabilidat ku ta sosegá tantu riba e akshonista komo riba gerensia i
hunta di komisario.
1