skolas públiku di boston

Cabo Verdean/OO SKOLAS PÚBLIKU DI BOSTON
SKRITÓRIU DI SUPERINTENDENTI
16 di Julhu di 2014
Karu familias di Skola Henry Dearborn,
Nu ta spera ki nhos sta ta ten un bon Veron y no sta ansiozu pa odja nhos na es Outonu. Nu sta ta skrevi nhos oji ku 2
novidadi ki nu kre pa nhos sabi. Primeru, Jose Duarte aseita junta a nos ikipa di skritóriu sentral na anu ki sta ta ben. Nu
ta gostaba di spresaba nos agradesimentu sinseru pa servisu y apoiu valiozu estraudinariu ki Sr. Duarte da nos komunidadi
di Dearborn. Sima nhos sabi, el lidera nos sforsu di "turnaround" pa últimus kuatu anu y trabadja di pertu ku komunidadi
y ku Massachusetts School Building Authority pa torna un vizon di un idifísiu mudernu ku konsentrason STEM na un
realidadi.
Enkuantu nu sta esitadu pa da boas vindas pa Sr. Duarte na se novu puzison, el ta signifika ki nu ta ben ten un novu lider
di skola na Outonu. Nu pidi Mweusi Willingham pa ser Diretor Interinu di skola Dearborn STEM Academy pa nu podi
kontinua ta konsentra na STEM y lideransa forti ki ta apoiu kresimentu di skola y tranzison pa un novu idifísiu. Sr.
Willingham foi resentementi Diretor Interinu na Skola K-8 Mildred Avenue. Antis di kel, el era diretor di prugrama
STEM di BPS y Diretor di Skola Engineering di 2005-2011. Karera di prufesor di Sr. Willingham na BPS kumesa na 1996
na Liseu Burke komu prufesor di Matimátika ondi el foi nomiadu pa Golden Apple Award na 1998. Sr. Willingham ten
un Lisensiatura na Arti di Williams College (1990), un Mestradu di Idukason di Harvard Graduate School of Education
(1996) y un Mestradu di Idukason di University of Massachusetts (2004). Nu sabi ki nhos ta ben fika inpresionadu ku
dedikason, enpenhu y vontadi di Sr. Willingham pa trabadja di forma kulaburativu ku nhos, nhos kriansa y prufesor y
pesual di Dearborn, pa asegura ki tudu kriansa ten oportunidadi di ten susesu.
Gosi ki nu aranka ku prujetu di Akademia STEM nu ten oportunidadi pa identifika stratejia ki ta puzisiona Dearborn pa
susesu na futuru. Nu fazi un pruposta novu pa Kumitê Skular di Boston ki ta kriaba un parsiaria novu entri BPS,
Dearborn y Skola "Charter" Dudley Street Neighborhood. Es parsiaria ta lansaba Dearborn komu un skola "charter" di
distritu kumesandu na anu skular 2015-16, y trazi ku el abilidadi pa ten dia mas alongadu di skola, novus rekursu y
konsentrason STEM na tudu nivel. Es parsiaria ta dezenvolvi un "pathway" K-12 baziadu na STEM avansandu y altu
aproveitamentu pa alunus na komunidadi di Roxbury y na Boston interu.
Es konseitu sta na fazi inisial y nu ta gostaba di konpartilha mas y sabi kuze ki nhos ta pensa. Nu ta spera ki nhos ta podi
enkontra ku nos na reúnion komunitariu fetu pa Greater Boston Interfaith Organization na Igreja Roxbury
Presbyterian, 328 Warren Street, Tersa-Fera, 19 di Agostu, 6 di tardi. N ta sta la djuntu ku Sr. Willingham, Lindsa
McIntyre ki é Diretora di Liseu Burke, asi komu reprezentantis di Skola Charter Dudley Street y txeu di nos parseru di
Dearborn.
Nu ta akredita ki es novu relason ta permiti Dearborn atinji se putensial masimu komu un skola di klasi-mundial ki ta abri
oportunidadi di Sekulu XXI pa alunus y famílias ki ta vivi na kurason di sidadi. Sima nhos sabi, Kumitê Skular aprova
lukalizason tenpurariu di Dearborn na es Outonu y pa prósimu 3 anus enkuantu sta konstruídu lukalizason di Greenville
Street. Primeru dia di skola é Kinta-Fera, 4 di Setenbru, na idifísiu di Burke na 60 Washington Street na Dorchester. Nu
ta spera pa odja nhos na dia 19 di Agostu y di novu na primeru dia di skola!
Atensiozamenti,
John P. McDonough
Superintendenti Interinu