Descargar

Avientu 2013, xineru, febreru, marzu, abril y mayu
2014
Palaciu de Valdecarzana (Archivu Históricu d’Avilés). 18’30 hores.
Vienres, 17 de xineru de 2014
L´Extraordinaire destin de Madame Brouette
(Madame Brouette) (2003) de Moussa Sène ABSA
(Senegal-Francia-Canadá; Les Productions La Fête Inc. / Les
Productions de la Lanterne / MSA Productions; Color,
Dolby Digital, 2003. Thriller social traxicómicu), 104
minutos. Versión Orixinal (francés) con subtítulos
n’español.
Guión: Moussa Sène ABSA, Claude GILAIZEAU y Gilles DESJARDINS. Fotografía: JeanJacques BOUHON.
Producción: Badou BÂ, Danielle CHAMPOUX, Rock DEMERS, Claude GILAIZEAU y
Moussa Sène ABSA.
Montaxe: Matthieu ROY-DÉCARIE. Música: Mamadou DIABATÉ, Majoly FIORI y Serge
FIORI.
Interpretación: Rokhaya NIANG (Mati), Aboubacar Sadikh BÂ (Naago), Kadiatou SY
(Ndaxte), Ndèye Seneba SECK (Ndeye), Bassirou DIAKHATE (Biraan), El Hadj DIENG
(Padre de Mati), Samba WANE (Inspector de Facienda), Mamadou DIALLO (Policía),
Seynabou SARR (Fía del Comisionáu), Ousseynou DIOP, Akéla SAGNA, Moustapha
NIANG, Juliette Aita BÂ, Mody FALL, Ibrahima Mbaye SOPE.
Argumentu: Festexando’l "Tajaboom", cuando tol mundu s’amazcara, les muyeres
d’home y los homes de muyer, Naago que ta borrachu, nun quier atender pa lo queý
pide Ndêye, que vaiga ayudar a la madre nel partu. Tampoco llevanta un deu cuando
unos gamberros-y peguen a la neña. Pal otru día, Mati ta esperándolu... Nel distritu de
Niayes Thiokeert, un barriu degradáu de Dakar, siéntense disparos al alborecer.
Naago,feríu, sal de la casa de Mati y, por culpa l’alarma vecinal, ella, a la que toos
llamen Madame Brouette, resulta la principal sospechosa de matar al so amante... Les
muyeres que la conocen defiéndenla, mientres los homes, nun paecen dispuestos a
perdonar esti actu, porque, a fin de cuentes, ¿en qué pararía too si les propies
muyeres la imitaren?...
Nes hores siguientes, la investigación policial va asoleyando, nuna especie
‘flashback’, la dura vida de Mati, madre soltera, rapaza divorciada que tuvo que
buscase la vida arrastrando una carretilla cargada de productos diferentes peles cais
del mercáu de Sandaga, mientres cola so amiga Ndaxté, a la que rescató d’un home
violentu y maltratador, ,va alimentando los suaños d’una vida meyor pa la so fía
Ndèye, abriendo un restaurante pa poder tener una vida respetable ensin depender yá
de naide, porque lo que Mati necesita ser llibre y independiente. Igual qu’un páxaru
necesita volar lloñe de cualquier xaula, asina que nun necesita a los homes y, cola
amiga, ta preparada pa too, p’afitar les sos esperances.
Por desgracia’l destín llevóla hasta Naago, un policía tan seductor como
corruptu nel que vuelve a creer qu’atopó al home de la so vida... Pero esta esperanza
esfúmase pronto por culpa les mafies llariegues que controla’l policía... Asina que,
cuando Mati se da cuenta que ta otra vez embrazada, nun quier aguantar más la
presión d’esa convivencia tan llaceriosa y convence a Ndaxté, pa facer un trabayu únicu
de contrabandu que les dexe cumplir el so vieyu sueñu hosteleru. Hasta qu’otra vez
más, Naago se cruza nel so camín...
Nota crítica: verdaderu cantu a la llibertá y la evolución de les mentalidaes frente a los
llastres de les tradiciones que discriminen y el machismu relixosu, Madame Brouette
vien a ser la voz de la lliberación de la muyer senegalesa, africana y universal, ente
coros narrativos africanos y una delicada estilización que dan puxu al rellatu d’una
sociedá, d’un mundu qu’Occidente, dende la so distante hipocresía, casi nun ye quien a
prexulgar d’alcuerdu colos sos propios intereses... Historia, en fin, d’una muyer
lluchadora que se rebela escontra les convenciones d’un patriarcáu que la separta, pa
tornase en símbolu y exemplu muncho más universalmente necesariu de lo que la
nuestra gayaspera suficiencia taría dispuesta a almitir. Feminismu básicu, colorista y
desenfadáu pa un cine necesariu y urxente.
Acoyida y reconocimientos: Osu de Plata a la Meyor Banda Sonora nel Festival
Internacional de Cine de Berlín 2003, Premiu Poitou Charentes al Meyor
Llargometraxe nel Festival Panafricanu de Cine y Televisión d’Ouagadougou 2003,
Premios al Meyor Actor (Aboubacar Sadikh Bâ) y Especial del Xuráu nel Festival de
Cine de París 2003 y Camelia Blanca nel FiSahara 2005.
Moussa Sène ABSA, la polifacética voz de la esperanza
Ñació en 1958 en Tableau Ferraille, barriu de Dakar (Senegal)
nuna familia “serer”, esti artista tan arteru foi actor teatral
enantes de dirixir la so primer representación (La Légende de
Ruba)... Dempués escribiría guiones cinematográficos (el so
guión pa Les Enfants de Dieu ‘Los Fíos de Dios’ premióse nel
Festival de Cine Francófonu de Fort -de –France) pa, dempués
de los años ochenta, dirixir les sos propies películes, reconocíes yá dende la primera Le
Prix du mensonge ( El preciu de la mentira ), Tanit d ' argent nel Festival de Cine de
Cartago 1988, hasta Ça twiste à Poponguine, con varios premios internacionales en
1994, Tableau Ferraille, ganadora del Premiu a la Meyor Fotografía nel Fespaco 1997,
o L’extraordinaire Destin de Madame Brouette, Osu de Plata a la Meyor Música na
Berlinale 2003.
Tamién ye productor (por exemplu, de telecomedies pa la Televisión Goorgorlu
de Senegal), músicu, pintor y escritor, asina como profesor na Universidá West Indies
de Barbados y nel Columbia College de Chicago. Autor tamién d’una decena
documentales sobre’l so país, participa nel guión, la producción, la música y el
montaxe de casi toles sos obres de ficción ente curtios y llargometraxes.