Kärwe
Transcrição
Kärwe
Der Anfang Wie`s alle Johr scho immer gewese Wird etzt die Kärwebräidicht vorgelese. Drüm gebt etzt all emol endlich Ruh, halt äuer Mäuler unn hört gut zu. Die von auswärts, wu nix voschdene Müssen owwer trotzdem net auegehne. Wenn alle loache, loacht ihr dezu, Wenn koaner klatscht, nocht gebt ihr Ruh. Mir fräüe uns üwwer äüch Fäüerwehre Unn sähe äüch in Höhfld immer gäre. Die Oarfler die soan ruffgelaffe do könnt ihr onnere emol goanz schö gaffe. Selbst die Näübrünner finne zum feiern de Wech do rü, Diete unn Linnelboach schäüt ko Koste unn ko Müh. Doch etzt bin nur ich dro mit m´ räide Sost geht än Dal von de Gschicht a no bläide. Des Johr is allerhoand bassiert Unn mir howwe uns a net scheniert den oane oder oannere durch die Scheisse gezouche; S`is alles wohr unn nix gelouche. Kärwe Kärwe 2015 Lieber Ein Auswärtiger Die Kärwe letzt Johr woar goanz famos de Gsoangveräi, der feiert groß. Die Kärweboarsche woarn scho alt un trotzdem soan se durchs Dorf gewallt. Die Höhflder woarn Soamsdes all baff, die hoawe in dem Alter jo a no än Aff! Oan devo hoawe se hoamgedroache, der hot goanz schö uwwer die Schdräng drügschloache. Äm Sunnde soan se all wieder fit Unn reise die goanze Mäude mit. Noch m Göügadoanz hot ma Schdräußle gschmisse; Etzt stehn mir do, goanz schö bschisse. Letzt Johr hot sich oan gebürtige Höhflder getraut, sost hot ma uff äighaierte gebaut. Des Johr wärds rümgedröht gemoacht; Des schoaffe mir a sou, des wär jo geloacht. Kärwe Kärwe 2015 Alles wird gut Vorschdoandswoahle woarn in dem Johr daß des net leicht wird, woar jedem kloar. Beim Sportveräi is es recht still, do waß ma net ob ma söll oder will. Mir muntere uff, hoabt gudde Mut; Ihr wird sehe, die Soach wird gut. Kärwe Loang hot`s gedauert im Fäüerwehrloand, etzt hoawwe ma widder än näüe Kummendoant. 27 Joahr gings mit m` Deufel zu, do braucht ma dennoch zum Üwwerläiche säi Ruh. Hätt er ma nämle koan näüe gfunne hätte uns die Kambener üwwernumme. Des wär nocht alle zwa net goanz ghäüer; Do wösst ma net, is des denne oder unner Faüer. Trotzdem hot ma s`schließle gschoafft unn s` hot sich oaner uff gerafft. Der steht goanz wewwerich vorne dro, s` erschde Jubiläum is a scho do. Drüm ihr Laüt seid net sou spießich; Die nächste Johr die werde riesich. Kärwe Kärwe 2015 Der Weg ist das Ziel In Höhfld hoam ma oan, der lösst s` immer groache, ohne Ihn hät ma net sou viel zu loache. Er hot s` als long net in die Bräidicht gschoaffd Owwer des Johr hot a sich emol widder uffgerafft. Säi größd Problem, do find die Seel ko Ruh Is, wenn die Werdschoaffd is zu! Er joammert unn wimmert unn steht devor Doch zu bleibt häüt des Wirtshaustor. Do hilft owwer nix, de Durscht is groß, sou lafft er Richtung Nigglshause los. S` Schützenhaus is säi erschdes Ziel Doch do geht oan dem Obend a nimmer viel. Er dut joammern unn dut gräine; „Geh ich halt weiter, woas werd säine.“ Än loange Wech voll Hunger unn Durscht; „Ich wird scho woas grieche, wu, is mir wurscht.“ Wu sost die Radler Pause moache Hot er widder nix zu loache. Drüm is er hordle weitergewallt unn mecht ämol in Goammere halt. Do woar Versoammlung von de Fäüerwehr, doch zu säim Schreck gaits do a nix mehr. Etzt steht er do, goanz voller Groam; „Muß ich etzt a no doarschdich hoam? Ich hoab no än Kumpel in Goammere hogge, do läüd ich etzt ämol oan de Hausdürglocke“ Unn woas ä Glück, der mächt a no uff; Sou künnt er etzt doch no zu säim Suff. Sie hogge zoamme in de Hundehütte Unn dunn oans noch m` oannere äineschüdde. Wie die Sunn üwwer die Burch dut auerblitze will a hoardle hoanneflitze. Oamm Boahnhouf steht ä schöne Boank uff dere läicht er sich erschd emol ä wene loang. Zum laffe is es em doch zu weit, er ward uff de Zuch, er hot jo Zeit. Es wird em koald, er hot etzt genuch: „Fäiert noch Höhfld üm die Zeit goar koan Zuch?“ Sou muss er laffe, es nimmt en koar mit, sou iss er hald unnern ………………! Kärwe Kärwe 2015 Dumm gelaufen Än Mo, er wohnt oam Schützeegg der is moanchmol goanz schö kegg. Wenn se dähoam ä mol widda streite, sücht de Hausherr mit m´ Road des Weite. N´ Hinnerdörfler hillt n´uff „ Woas is, willst net mit nuff? In Distelhause is ä groß Fest, do kumme immer n´ Haufe Gäst.“ De Drohtesel werd ins Egg gebrennt unn sou wie ma is in de Bus gerennt. „Ich hoab ko Geld, des is ma wurscht, däfür hoab ich n´ große Durscht“ Oam Fest do steht er goanz verdrosse; Do werde jo nur Mitglieder näigelosse. Doch des Schlaule is von Welt unn hot sich hordle ogemeld. Etzt is er nimmer inkognito Unn säüft unn säüft, woas is er froh. Uff jedere Seite ä Bier in de Flosse Wird oans noch m´oannere äinegegosse. Die Promille stehn m´ scho im Gsicht „Mäin Gott, bin ich häüt dicht. Guggt net sou, ich geh etzt naus, woas ouwe näi, muss a mol unne naus“ Noch m Gschäft denkt sich die Kappe: „ Is des ä schdaile Schaißhausdrabbe“ Er mächt n´ Schritt, scho is er gflouche Unn hot sich oarch des Gsicht vobouche. Er schdroambld wie n´ Maikäfer uff m´ Buggel. „Woas moach ich etzt, ich bsoffener Zwuggel?“ Nocht künnt er no ins Groangehaus Unn denkt sich:“Wie kumm ich aus dere Gschichte raus?“ Die Ärzt howwe mit säiere Fra gered. Die säicht:“Den houl ich net!“ Die Tochter, die hot nocht Erbarme Unn höült n´ hoam, den arme. Er hot hoffentlich koan große Schoade genumme Unn mir hoffe dass se all uff die Kärwe kumme. Kärwe Kärwe 2015 Die wilden Kerle (oder: Zwei ausser Rand und Band) S` is jedes Johr, weil es is sou schö, des Gauditurnier douwe uff de Höh. S` Fräüdehaus woar wie immer voll däbei; Bei denne gaits uff m` Platz wenichstens ko Schreierei. Die fräüe sich, ob se voliere odda gewinne unn dunn beim dusche die schönste Liedle singe. N` Stiefel gfüllt mit Cola-Weize hot beim Dusche scho säi Reize. Domit woar de Ofong nocht gemoacht für ä turbulente Noacht. Zwa fülle sich den Humbe mit ä bissle Cola unn äre Floasche Rum Alle oannern denke sich: Soan die dumm? Die gäwwe sich den Stiefel hin un her Unn ma was goar nimmer, wer hot mehr? Dunn sich zu zwatt älloa des Ding näibrüchle; Dennoch siehste die Dollage de Buggel noabüchle. Unn oam End vom Näüe Berch säiere Schoanze falle se näi de Oagger uff ihr Roanze. Än oannere is do a vobeigerennt unn hot net gemerkt, dass in de Frucht wer pennt. Es uffstehne fellt ä nä sakrisch schwer. „Wu houle man doann etzt Hilfe her? Kärwe Kärwe 2015 Fra unn Schwester soan im Bett, do werde ma häint noacht nimmer gerett!“ Die müde Gnoche aus äm Oagger gezouche werd Richtung hoamwärts oabgebouche. Endlich beim erschde im Haus oghumme säicht er: „Ich kumm nimmer nuff, ich blai liwwer hunne.“ Gesagt, getan unn ohne Bouche is er nocht ins Bett näigflouche. Ihm is sou schlecht, es werd m` scho übel; De oanner rennt unn sücht än Kübel. Er is jo eichentlich än helle Koupf unn nimmt halt schnell än Blumetoupf. Die Ausnüchterungszelle mit Tüchle ausstaffiert werd guten Gewissens naus marschiert. Doch halt: „Die Zichöüner soan im Ort, do konn ich net sou oafoach fort.“ Er schlisst zur Sicherheit erschder zu unn geht nocht naus in aller Ruh. Mecht nommel Richtung Sportplatz nuff; Stellt äüch des emol vor, bei sou äm Suff! Dort hot er nocht säi Däschle gschnappt unn is dennoch no zu ihrm Fäldloacher gedappt. Vollgepackt mit schönen Sachen die das Leben schöner machen, im Weekend-Feeling lafft er hoam; Denkt sich nur: Ich glaab, ich droam. Unn die Moral von dere Gschicht: Sauf die Hälft, sonst biste dicht! Kärwe Kärwe 2015 Trockene Hitze Üwwer de Kinnergarde hoawe ma erschd letzt Johr gschriewe owwer schäinboar is bei denne doch nix hänge gebliebe. Die moache die gleiche Fähler wie beim letzte Fest unn vertreiwe mit Ihrer Sturheit no die letzte Gäst. Die Fäüerwehr hot Bilder gemoacht fürs Jubiläum häüt unn denoch hot ma sich üwwer ä frisch gezapftes Bier scho gfräüt. Unn jetzt de Clou: Der Ausschank woar und bleit a zu! „Bier gibt’s erst wenn die Veranstaltung beginnt Und seht Ihr da vielleicht schon ein Kind?“ Die Brandlöschung ist wergle fehlgschloache; oallerhoand, koann ich äuch soache. Aus Trotz is moancher Fäüerwehrmo mittoachs zum Festle goar nimmer no. Es woare nocht a wene Gäst do bei dere Hitze sou blait ma uff dem Gärschdesaft nocht sitze. De nächste Doach, ihr liewe Läut hot sich de Fanfarezuch drüwwer gfräüt! Selbst die brenges net uff oamol leer, do muss oam Freide no ä Väschba her. Ob die mit de Kinn des nommel raffe wie ma Esse un Drinke dut verkaffe? Des is doch werkle net sou schwer, nocht bleit die Kasse a nimmer sou leer. Bei uns gaits esse unn Drinke für alle Läut, weil mir feiere Höhflder Kärwe häut. Kärwe Kärwe 2015 Motorschaden? In Höhfld wird n Haufe gheiert unn denoch a ordentle gfeiert. Ball allen Monet künnt die Pfärrn unn eichentlich mecht se sou öbs jo a wergle gern. Oa Päärle denkt sich: „Des moache mir a unn trete inn Höhfld vor de Traualtar.“ Wucheloang howwe se sich uff den Doach nocht gfräüt unn loade äi n´ Haufe Läut. Owwer net all von de Verwoandschoaft loade se äi; Denn do wär a schwarzes Schoaf däbei Der woar däsdewäche goanz empört unn hot den Brautzuch empfindlich gschdört. „Äüch zeich ichs, des konn ich äüch soache, ich stell in de Wäch mäin Bulldog unn Woache.“ Sie räide mit m´: „Oh, stells halt fort.“ „Geht etzt net, ich hock uff m´ Abort.“ „Stell n´ halt weg, des is doch net schwer.“ Säicht er bloß: „Die Batterie is leer“ Sou moache die all, s` is net gelouche üm des Fuhrwerk n´ große Bouche. Noch de Kerch woars daus recht woarm, die Gäst howwe all ihrn Kittel unnerm Oarm. A wenn der Karre nimmer laffe dut Mecht er sich doch als Kleiderständer gut. „Loßt n´ ruhich weiter kacke, mir hänge no die Hochzichsjacke.“ Hinnenoch hot ma nocht ghört, der blöde Boug hot goar net gschdört. Kurz noch die goanze Zeremonie is der Karre uff oamol nimme hi. Er fäiert n´ weg in aller Ruh, woas säicht ma nocht etzt dodezu! Hinnenoch blöcht n` säi schlechts Gewisse: „Etzt howwe ma selwer näi de Oarsch gebisse.“ Kärwe Kärwe 2015 Der Jungbrunnen Weißwärschdfrühstück, wer hot des schon, bei uns werd des loangsoam zur Tradition. S` Fräudehaus is zu säim Fünfäzwoanzichjähriche uff de Gedoanke kumme, de Fanfarezuch, mit viel ehemoliche, hot`s nocht üwwernumme. Als Vorbode vom Oktoberfest is des moanch oannere oawwer net goanz ghäuer. Unn schenne scho: „ Bei dem Äitritt is mir des zu däuer.“ Des Fest müsse mir im September moache, ihr liewe Läut weil schböda hoawe die Münchner Metzler für unner Weißwärschd ko Zeit. Wos ich jetzt soach is net gelouche: Die werde extroa mit m` Christopherus zu uns uffe gflouche. Ihr Läut, des is koan Stuss; Sou bleiwe die steril un äin Hochgenuss. Zu dem Frühschoppe spiele die Eierschemer ihr Blosmusich pur. Für moanche Gäst is des wie uff de Kur. Mir fröche uns: Laid des oan de fetziche Musich hier oder vielleicht doch oan de Wärschd un m` Bier? Sogoar de Rollator blait do vor de Tür daus stehne unn sie könne uff oamol widder uffrecht gehne! Unn merge noch m` Middoachsschlof: Mäin Karre steht jo no hinne, ich Schof! Häut hom ma wieder in de Halle ä Fest Drüm uffgebasst dass an häut net wieder vogesst. Kärwe Kärwe 2015 Lichtspiele(reien) Ihr wößt mir hom ä näue Halle Doch leider finne die net alle. Däs Drappelicht is nimmer sou hell Weil die Büsch devor die woachse jo schnell. Wenn ma do uff m` Hoamwech sich die Gnoche bricht Laid des bei moanchem vielleicht net immer oam Licht. Oar hot sich oan dere fistere Drappe die Knoche scho voschoamariert Es muss halt erschd öbs bassiere, bevor bei de Stadt woas bassiert. Etzt hot ma zwa däure Disäinerloambe installiert woas oawer a widder zu nix führt. Drüm basst uff wenn er häint noacht hoannedackelt, dass er net üwwer die fistere Drappe wackelt. Oam Kinnergarde geht de Wech häl unn äiwe noa Nocht fellt a koar die Drappe roa. Unn die Moral von dere Gschicht: Ma setzt koan große Busch vor ä Schdrosselicht. Kärwe Treppe bei Nacht: Kärwe 2015 Eilmeldung Aus sicherer Quelle unn net gelouche werd demnächst in Höhfld ümgezouche. De Gsongvräi geht aus de Volksbank raus unn zieht üwwer Winter widder ins Bürcherhaus. Wie die Singvöuchel wölle die des moache; Winter- und Sommerdomizil, es is zum loache Owwer des Ding dohinne, es is koum zu fasse reißt halt ä riesiches Louch in die Kasse. Etzt müsse se mit dä Euros geize unn dowwe ko Geld mehr do hinne zu heize. Weil alles mittlerweile friert werd halt widder in die Halle marschiert. Vielleicht finne se oan unn grieche den Schubbe wieder los, nocht wär a die Not in de Kasse nimmer sou groß. Kärwe Kärwe 2015 Na denn Prost Beim letzte Thema, do werd net geloacht, weil die Fäüerwehr hot extroa n` Zapflehrgoang gemoacht. Schließle wölle mir äüch ä guts Bier serviere bei sou moanchem Zapfer loangt ma sich do als scho oans Hiere. Unner Zapfer hoawe fest geübt, dass sich sie Bierstimmung häint oabend net trübt. N` Haufe Läüt soan üm des Üwungsfoass rümgerennt unn mir hoffe, von denne hot koaner gepennt. Mir biete ko Nabrünner und ko Frauebier; No mir drinke selwer liwwer sou ä Bier. Bis etzt hot sich no koaner beschwert; Die könne des halt, sou wie ma hört. Damit jeder waas, dass er uff em Festle woar lösche ma mit äüch no ä bissle, des is kloar. Weil jedes Lösche, des braucht Zeit, üwwerhaupt uff em Fest unn zur Kärwezeit. Drüm soach ich, dut`s äüch no ä wene schmecke losse owwer moacht uff m` Hoamwech koa dumme Bosse. Hoamzu losst foahre äüer Fraue weil die meistens koa sou grosse Räüsch uffbaue. Zum gute Schluss soach ich äüch goanz getrost, Uff die Zapfer, des Fest, die Kärwe unn unner Gäst: Prost Kärwe Kärwe 2015 Der Schluß Des wors woas des Johr is bassiert unn ihr seht, mir howwe uns wergle net scheniert. Owwer wenn die Läüt sodde ollwere Bosse moache muss ma oafoach drüwwer loache. Mir hoffe dass koaner beleidicht iss unn mecht aus dene Soache koa groß Gschiss. Sost is er nächst Johr widder dro unn de Fanfarezuch is üwwer säi erschde Gschichde froh. Drüm wölle ma etzt no ä wene lustich säine; Üwwer des woas woar, nimmer länger gräine. Zum Göugadoanz äm 5 stehn ma widder do nocht peckt jede Fra ihrn Mo. Mit m` Altbach-Duo dunn ma häüt nommel loache unn singe unn ihr dut hoffentle äüer Doanzboa schwinge. Unn etzt is owwer wergle Schluß wie`s halt oamol säine muss. Feiert mit uns Kärwe und Jubiläumsfest Die Höhflder Feuerwehr freut sich mir Ihre Gäst. Kärwe Kärwe 2015 Vorstellung Schelleboarsch Stephan vom Unnerdorf Göügadräicher Maxi vom Hinnerdorf Bloatzer Horst von daus de Siedlung Wächelesboarsch Pascal vom Öüwerdorf Sireneboarsch Dieter aus Diede Kärwe 2015 Outtakes (Randbemerkungen) -Er hat jetzt eine ganz schöne Packung gekriecht, was man eigentlich nicht macht, für eine Sache, die man eigentlich auch nicht macht! -Ich geb äuch, des konn ich äuch soache, unn fress äuch weg de Schwardemoache -Eine Flasche Acolon ist gut, zwei sind guter -Wawawawabb(schnell sprechen), Tschakalaka Marakas, I am legend -Räimt sich zwoar net, owwer es ging net onnerschd -Räimt sich, daucht owwer nix -ALARMA -Äm Sunnde will ich ä Bier, Federweißer is oafoach „scheiße“ -Ich denk immer, ich muß aus „Gast“ einen Dialekt machen -Schwardemoache reimt sich immer -Habe fertich Kärwe 2015 Impressum An dieser Stelle möchten sich die Kärweboarsche 2015 bei allen bedanken, die in irgendeiner Weise zum Gelingen der Kärwe und der Kärwebräidicht beigetragen haben. Sei es durch Beiträge zum Inhalt, zum Verfassen der Reime, zum Gestalten und Vervielfältigen der Zeitung oder sonstiger Unterstützung beim Projekt Für schnellen Zugriff auch unterwegs Online auf Dorf-Hoehefeld.de Oder direkt mit QR-Code Mit dem Ding koann ma s`direkt uff em Händi läse. Kärwe 2015