February 21, 2012 Nyob zoo cov tsaavxwm ntawm txhua

February 21, 2012
Nyob zoo cov tsaavxwm ntawm txhua pawgntseeg,
Ua Vaajtswv tsaug rua Vaajtswv txuj kev xaiv mej lug ua Vaajtswv cov tubkhai kws ua Nwg teg num rua huv Nwg
pawgntseeg nuav. Kuv thov qhuas mej txhua tug hab ua mej tsaug rua teg dlejnum zoo kws mej ua.
Zoo le ze zujzug peb lub rooj saablaaj txwmxyoo, xyoo 2012, kws yog zag 34 yuav lug txug hab muaj nyob rua Garden
Grove California July 1 rua 6. Peb cov tsaavxwm thov tshaajtawm rua txhua pawgntseeg paub hab npaaj xaa cov sawvcev
tuaj koom le txuj cai xaa sawvcev huv kevcai lijchoj. Xwmtxheej sau npe, reserve hotel, hab lwm yaam muaj nyob taag
rua ntawm tsaab ntawv kws xaa tuaj nrug nuav. Thov cov tsaavxwm muab nwg ua tuabzoo saib, npaaj, hab coj moog
lawv le kom tseg rua huv tsaab ntawv nuav txhaj yoojyim hab tsi ua teebmeem rua pawgntseeg, HKM, los yog rua lub
hotel.
Dlua le ntawd yog mej muaj tej nqai kws mej xaav muab xaa ua “resolution” rua lub rooj saablaaj thaam, thov sau kuas
meej hab muab xaa rua thawj tsaavxwm tsi puab dlhau April 22, 2012. “Resolution” txhua nqai yuavtsum yog tuaj huv ib
pawgntseeg tuaj hab yog lub rooj tsaavxwm xaa tuaj. Tomqaab peb tau txais cov “motions,” cov DEXCOM yuav tsi has,
tabsis muab xaa rua paab kaavxwm saib “resolution” kws lub rooj saablaaj tsaa txavtxim sab coj lug thaam los tsi coj.
Xyoo nuav peb yeej tseem yuavtau sau nyaj paab num ntau yaam le yaav taag lug, tabsis muaj ib yaam tshwjxeeb kws
txhua pawgntseeg yuav tau npaaj yog “Hmong Mission Fund.” Tseeb tag peb yeej paab nyaj GCF rua C&MA txhua xyoo,
tabsis cov nyaj ntawd yog xaa moog rua C&MA ua num thoob nplajteb, tsi yog ua Moob cov num. Yog peb yuav vaam
cov nyaj GCF nuav rov lug ua num rua Moob, tsi muaj ib zag. Yog le ntawd HKM txhaj yuavtsum tau muaj “Hmong
Mission Fund” lug ua cov num rua Moob, hab thov kuas mej tshaajtawm hab npaaj sau qhov nyaj nuav ib xyoo ib zag
kuas tav uantej hab coj tuaj fij rua mo ua mission conference.
Xyoo nuav peb yuav muaj kev xaivtsaa 4 tug tsaavxwm huv HKM (2 tug xwbfwb, 2 tug txwjlaug), thawj namtsev, hab
thawj txivtsev. Mej leejtwg npaaj sab yuav taw leejtwg tshaaj le paab kaavxwm xaivtsaa taw, mej yuav tau xub nug nwg
tug kheej hab tau kev pumzoo lug ntawm nwg tug xwbfwb uantej. Ncu has tas ib pawgntseeg tsuas muaj cai tau ib tug
huv nwg pawgntseeg ua tsaavxwm huv HKM rua ib term. Txhua tug kws yuav lug ua num tsi has rua HKM, namtsev,
txivtsev yuavtsum yog ib tug thawjcoj hab ua tau lub neej zoo le 1 Timautes 3:1-13.
Ntawm Vaajtswv lub luag num,
Kx. Xeev Neeb
Thawj Tsaavxwm HKM