Směrnice Załožby za serbski lud za spěchowanje projektow
Transcrição
Směrnice Załožby za serbski lud za spěchowanje projektow
Směrnice Załožby za serbski lud za spěchowanje projektow we wobłuku serbskego twórjecego wuměłstwa, serbskego pśedstajajucego wuměłstwa, serbskeje literatury, serbskeje muziki, woplěwanja domownje a nałogow, źěła ze źiśimi a młodostnymi, wódychanja źiśi a młodostnych, zwenkainstitucionalnego wědomnostnego źěła, rěcnych kursow za górno- a dolnoserbšćinu, njestatnych serbskich muzeumow a domowniskich śpow, pśedewześow w sociokulturnem wobłuku kaž teke stipendiumow a serbskich kulturnych pomnikow I. Powšykne póstajenja Wótrězk I wopśimjejo powšykne póstajenja, kótarež se zasadnje za wšykne spěchowanja nałožuju. Wudospołnjajuce a wótbocujuce rědowanja k jadnotliwym spěchowańskim wobłukam wopśimjeju wótrězki II do XIV. 1. 1.1 Zaměr spěchowanja, pšawniski zakład Załožba za serbski lud pśizwólujo pódpěry ze zaměrom, serbsku rěc a kulturu ako wuraz identity serbskego luda wobchowaś a wuwijaś. 1.2 Za pśizwólenje pódpěry płaśe pśedpise pó §§ 23, 44 góspodarskego pórěda Lichotnego stata Sakska (Sakski góspodarski pórěd – SäHO) we wersiji z wózjawjenja z 10. aprila 2001 (SächsGVBl. b. 153) a Nachylne zastojańske pśedpise Sakskego statnego ministarstwa financow k § 44 Nachylnego Sakskego góspodarskego pórěda (Vorl. VwV-SäHO) z 20. oktobra 1997 (SächsABl. SDr. b. S649, S706), we wersiji z 29. septembra 1999 (SächsABl. SDr. b. S310, 316) w zwisku z pśedlažajucej spěchowańskej směrnicu kaž teke z kaznju k Statnemu dogronu mjaz Krajom Bramborska a Lichotnym statom Sakska wó załoženju „Załožby za serbski lud“ z 9. decembra 1998 (SäGVBl. b. 629) a z 26. nowembra 1998 (BrbGVBl. I b. 220). 1.3 Pšawo na spěchowanje jadnotliwych napšawow njewobstoj. Pśipłaśonk pśizwólujo se na zakłaźe wótwažowanja pó winowatosći we wobłuku k dispoziciji stojecych góspodarskich srědkow. 1.4 Raz pśizwólone pódpěry njewjedu daniž pó zawinje, daniž pó wusokosći k pšawu na spěchowanje w slědujucych lětach. 2. 2.1 Pśedmjat spěchowanja Pśedmjat spěchowanja su we wótrězkach II do XIV pómjenjone pśedewześa. Mimo togo móžo se wobchodniska źěłabnosć za rěc, wuměłstwo a kulturu Serbow wósebnje wuznamnych institucijow a zwězkow spěchowaś. 2.2 Z toś togo spěchowanja wuzamknjone su: a) pśedewześa z pśewažnje komercielnym charakterom, b) beneficne zarědowanja kaž teke c) pśedewześa k spěchowanju góspodarstwa. 3. 3.1 Pjenjezedostawarje Pjenjezedostawarje mógu byś pśirodne a juristiske wósoby. 3.2 Pjenjezedostawarje njamaju pšawo, pódpěry bźez pśigłosowanja Załožby za serbski lud tśeśim dalej dawaś. 4. 4.1 Wuměnjenja za pódpěru Spěchowanje jo jano móžne, wobstoj-li z boka załožby daloko segajucy zajm na napšawje. 4.2 Spěchuju se jano pśedewześa, z kótarychž pśewjeźenim se w casu stajanja pšosby hyšći njejo zachopinało. Załožba móžo we wopšawnjonych padach wuwześa dopušćiś. 4.3 Pjenjezedostawaŕje a tśeśe maju se, wótpowědnje swójej wugbaśowej mócy a swójomu zajmej, na napšawje a jeje financěrowanju wobźěliś. 4.3.1 Pśedewześe, wó kótaregož spěchowanje jo se pšosba stajiła, ma se wót zapódarja pšosby regularnje we wusokosći nanejmjenjej pěś procentow cełkownych wudankow ze swójskich srědkow financěrowaś. We wopšawnjonych padach mógu se wugbaśa, kótarež se w gótowych pjenjezach njewupłaśe, ako swójski późěł pśipóznaś. 4.3.2 Zapódaŕ pšosby ma se wó srědki priwatnych a zjawnych pjenjezedawarjow procowaś. Na dobrowólne, bźezpłatne wugbaśa tśeśich móžo se źiwaś. 4.3.3 Dobrowólne, bźezpłatne wugbaśa zapódarja pšosby a tśeśich njejsu wobstatk financěrowańskego, etatowego abo góspodarskego plana. Wóni maju se separatnje wupokazaś. Dalokož su wuznamne za pśizwólenje a spěchujobne wudanki se dopokazujobnje reducěruju, mógu se spěchowańske płaśby pówušyś. 4.4 Pódpěry mógu se jano zapódarjam pšosby pśiźěliś, kótarychž sedło jo w nimsko-serbskem sedleńskem rumje (Lichotny stat Sakska) resp. w starodawnem sedleńskem rumje Serbow (Kraj Bramborska) abo kótarež pśedłožyju projekt, kótaregož realizaciske městno lažy w nimsko-serbskem sedleńskem rumje (Lichotny stat Sakska) resp. w starodawnem sedleńskem rumje Serbow (Kraj Bramborska). Wó wuwześach rozsuźujo Załožbowa rada. 5. 5.1 Forma a wobpśimjeśe, wusokosć pódpěry Za pśedewześa pó cysle 2.1 sada 1 pśizwólujo se pódpěra ako projektowe spěchowanje. Institucijam, pómjenjonym w cysle 2.1 sada 2, móžo se institucionelne spěchowanje pśiźěliś, a to w formje źělnego financěrowanja. W pśigódnych padach ma se pśi tom pódpěra ako kšuta suma pśiźěliś. Njejo-li to móžno, pódawa se pśizwólenje w formje późělnego financěrowanja abo ako dofinancěrowanje pótrjeby. Pódpěra pśizwólijo se ako slědk njepłaśomny pśipłaśonk. 5.2 Zakład za woblicenje wusokosći spěchowanja su cełkowne spěchujobne wudanki. K tomu lice we wobłuku projektowego spěchowanja w njepósrědnem zwisku z pśedewześim notnje nastawajuce wudanki. We wopšawnjonych padach mógu to teke wudanki za sobuźěłaśerjow byś, kótarež su se ku góźbje pśedewześa pśistajili. We wobłuku institucionalnego spěchowanja lice k tomu zasadnje wšykne w etatowem abo góspodarskem planje institucije woblicone trěbne wudanki. 5.2.1 Wudanki za zawěsćenja mógu se ako spěchujobne pśipóznaś, jolic su pó kaznjach pśedpisane abo za dojśpiśe spěchowańskego zaměra notnje trěbne a jolic su se wót pšawniskeje doglědowarskeje instance załožby pśizwólili. 5.2.2 Wudanki za nakup abo zgótowjenje pśedmjatow mógu se ako spěchujobne pśipóznawaś, jo-li to za pśewjeźenje napšawy nejwěcej góspodarne rozwězanje. W pšosbje ma se rozjasniś, kak maju se pśedmjaty pó zakóńcenju napšawy dalej wužywaś. 5.2.3 Zastojańske wudanki mógu se we wusokosći maksimalnje 15 procentow wuzbytnych spěchujobnych wudankow pśipóznaś. 6. 6.1 Dalšne póstajenja k pódpěrje Njewótedajo-li se wótlicenje w póstajonem casu resp. w pominanej formje, se zasadnje samskemu dostawarjej dalšny raz srědki njepśizwóliju. Pšawo załožby na slědkpominanje wóstanjo wót togo njedotyknjone. 7. 7.1 Póstupowanje Pšosby wó spěchowanje maju se zasadnje z wužywanim wótpowědnego mustrowego formulara a ze wšyknymi trěbnymi pódłogami (glej 7.2) až k 31. januarej za projekty 1. połlěta kaž teke za cełolětne projekty a až k 31. julijej za projekty 2. połlěta běžnego góspodarskego lěta pla Załožby za serbski lud Postowe naměsto 2 02625 Budyšyn tel.: 03591 / 550 307 faks: 03591 / 4 28 11 e-mail: [email protected] zapódaś. Pópóznje zapódate pšosby se wótpowědnje k dispoziciji stojecym góspodarskim srědkam drugorědnje wobjadnawaju. We wopšawnjonych padach móžo se pšosba teke nakrotko, ale nanejmjenjej 8 tyźenjow do zachopjeńka projekta, stajiś. Pšosbowe formulary a wótpowědne informacije dostanjośo pód górjejce pómjenjonej adresu abo w slědujucych regionalnych załožbowych běrowach: Załožba za serbski lud Regionalny běrow Kamjenc Při pastyrni / Am Hirtenquell 4 01920 Chrósćicy / Crostwitz tel.: 035796 / 96 891 faks: 035796 / 98 960 e-mail: [email protected] Załožba za serbski lud Regionalny běrow Slěpe Dróha měra / Straße des Friedens 65 02959 Slěpe / Schleife tel.: 035773 / 70085 faks: 035773 / 700 86 e-mail: [email protected] Załožba za serbski lud Regionalny běrow Wórjejce Drježdźanska dróha / Dresdener Str. 18 02977 Wojerecy / Hoyerswerda tel.: 03571 / 41 80 26 faks: 03571 / 41 80 27 e-mail: [email protected] Załožba za serbski lud Wótrěd Chóśebuz Droga Augusta Bebelowa / August-Bebel-Str. 82 03046 Chóśebuz / Cottbus tel.: 0355 / 48576 461 faks: 0355 / 48576 462 e-mail: [email protected] Zasadnje njeměli pšosby pód minimalneju spěchowańskeju sumu 250,00 euro lažaś. 7.2 Pšosbje maju se pśipołožyś: - wopisanje projekta, z kótaregož daju se spóznaś wótglěd, póstajenje zaměra a wobpśimjeśowa koncepcija pśedewześa - pódaśa wó casowem wobłuku realizacije projekta - detailěrowany, wuwažony financny plan (rozklucowanje wšyknych ze zaměrom spěchowanja zwisujucych wudankow a nabrankow a jich wěcownje a liceńsce korektne rozłoženje) - pśi prědnych pšosbach a pśi kuždej notarielnje wobkšuśonej změnje towaristwow abo drugich priwatnych nosarjow pódłogi, kótarež pódawaju informacije wó zaměrje a pšawokmanosći kaž na pś. towaristwowe wustawy, dopokaz zapisma do towaristwowego registra pśi amtskem sudnistwje, pśipóznaśe powšyknowužytnosći pśez financny amt, dogrono towaristwarjow (pla GmbH). 7.3 Dopokaz wó zaměrej wótpowědujucem wužywanju pśizwólonych srědkow ma se tak pśewjasć, ako to w pśizwólenju pódate wuměnjenja a wótpowědnje płaśece dodatne póstajenja pśedwiźe. 7.4 Za pśizwólenje, wupłaśenje a wótlicenje pódpěry kaž teke za dopokaz a pśespytowanje wužywanja a ewtl. trěbne rozwězanje pśizwólenja a slědkpominanje pśizwóloneje pódpěry płaśe Vorl. VwV k § 44 SäHO, jolic njejsu se w pśedlažajucej směrnicy wótbocenja dopušćili.