2010 Drai Di nit um, dr Elgoog goot um
Transcrição
2010 Drai Di nit um, dr Elgoog goot um
Fasnacht 2010 Drai Di nit um, der Elgoog goot um Do lyttet us Amerika mir kirzlig s Dante Huldi a, ganz uffgregt und empeert: Y haig, so hett si mer verzellt, der Bebbi-Sagg z frieh uusegschtellt das haig si schampar gschteert! Im erschten Augebligg lycht gschoggt hani mi aber sofort gfrogt: „Wohär ka die das wisse?“ Die Frau wohnt doch in Santa Fé, vo deert ka die my Sagg nit gsee, do wird doch naime bschisse! Am näggschte Daag liis y s im BLIGG: S isch weder Bschiss no isch s e Trigg s steggt Guugel Mäps derhinder. Die föttele fir vyl, vyl Gäld vo A bis Z die ganzi Wält, jä - alles! Sogar Kinder. Spontan fallt eim dr Orwell y, me frogt sich: „Muess das wirgglig sy?“ E Fall ächt fir d Justiz? S isch au em Daateschitzer Thür die ganzi Gschicht nit wirgglig ghyr, drum wehrt er sich fir d Schwyz! Är hett die Guugel-Stroosse-Gselle grad vor dr Richter stelle welle, dä sell das Zyyg verbiete! Doch Guugel isch e Wältkonzärn und die hänn Richter gar nit gärn, will die jo s Gsetz dien hiete! Drum duet me kurz e bitzli triggsle und aifach alli Gsicht verpixle plus zwai drey Auti-Schildli... Zfriide isch dr Daateschitzer, und s frait sich der Netz-Benitzer ab de scheene Bildli! D Sporepeter sinn doo gspalte: „Street View“ eergeret die Alte (vo däne hämmer vyl...), die Jungen aber finde s cool das „Street View“ syg e nitzlig Tool, wär s ablähn’ syg senyl. Jä guet, am Änd sehn s au die Alte: Dr Forschritt ka me nit uffhalte, und findt me s au dernääbe, was isch derby, me schiggt sich dry, vilicht ka s jo au nitzlig sy, im ganz normale Lääbe: Hesch Ferie buecht uff de Seychelle und vilicht vorhär luege welle, wie me zem Hotel fahrt? Dangg „Street View“ merggsch, s isch nur e Wohnig, und schlimmer no: die git s gar noonig! Scho hesch dr d Feerie gspart. Doch s Allerschlimmscht, wo kennt passiere: Kasch nit am Cortège mit marschiere, bisch gschäftlig z Wollerau! Muesch z Basel nur d Blaggedde kaufe, der Cortège kasch per „Street View“ laufe, und erscht no ohni Stau. Das sinn doch starggi Argumänt, wo wichtig sinn und zletschtemänd klar für die „Street View“ spräche! Ass d duur und duur durlychtet wirsch vom gääle Männli uf dr Pirsch, isch schliesslig kai Verbräche! Wie s uusekunnt, isch zimlig klar: In fimf, zäh Johr, wie wunderbar, hänn mir die gleesig Wält! Vom Südpol bis in hooche Norde isch jede Meter uffgno worde und Guugel schwimmt im Gäld! Und mir as Guugel-Marionette, wo lengschtens wieder retour wette, dien an de Fääde hange: Der Elgoog losst ys nimme los, in Guugel-Earth, -Maps, -Wave und -Strooss sinn mir uff ewig gfange! Und die Moral von der Geschicht? Dr Elgoog hett scho zimlig Gwicht, scho isch er zimlig mächtig, me kennt em jetz no knapp entgoo, wenn alli wurde zämmestoo, es giengt ys nochhär prächtig! (Doch leider wird sich s Blatt nit wände, mer dien as Marionette ànde...)